Арқалық қаласының бұрыңғы әкімі Берік ӘБДІҒАЛИҰЛЫНЫҢ бастамасымен қаламызда идеологиялық жұмыс күшейгені баршаға аян. Соның бірі – Торғай кітапханасы атты әдеби жинақтар сериясы. Жақында аталмыш серияның алғашқы «Топжарған» топтамасы жарыққа шықты.

Торғай өңірі талантты ақындардың ордасы екені баршаға белгілі. Қазақ поэзиясының, жалпы әдебиетінің көрнекті өкілдерін түлеп ұшырған өлкенің бүгіндері есімі жиі аталмай жүрген ақындары да аз емес. Мұны Торғай кітапханасының алғашқы топтамасына енген ақындардың есімінен аңғаруға болады. Кітапқа арқау болған жыр шумақтарын редакция алқасының мүшесі, жергілікті пединститут деканы, «Торғай ақындық мектебі» ғылыми жұмысының авторы Айбек Қалиев жинақтаған.
Жалпы, Торғай кітапханасы атты серияның мақсаты – осы жердің талантты ұл-қыздарының шығармашылығын жарыққа шығару, оқырманмен қауыштыру болса керек. Бірақ, редакция алқасы бүгінгі замандастарымыздан бұрын Торғай ақындық мектебінің бастауында тұрған тұлғалардың шығармашылығынан бастауды ұйғарған еді. Кезекті жинақтарға бүгіндері қалам тербеп жүрген, көбіне, жас авторлардың туындылары енбек.

Қайрат ЕСМАҒАНБЕТОВ