«Отан отбасынан басталады» дейміз. Жанұдағы татулық, бірлік, береке - әр баланың болашағы. Себебі бала ұяда не көрсе, ұшқанда соны іледі. Отбасының, әке мен ананың жылуын, мейірімін, махаббатын сезінген бала бақытты болып өседі. Ал бақытты бала айналасындағыларға, қала берді қоғамға тек жақсылық жасайды.

Бұл тақырыпты қозғап отырған себебім, биыл екінші жыл ҚР Президентінің Жарлығымен Қазақстанда қыркүйек айының екінші жексенбісі «Отбасы күні» болып белгіленді. Бұл мерекенің басты мақсаты – отбасылық құндылықтарды насихаттау болып табылады.

Осындай мерекені атап өтуде көңіліне қаяу түсіретін балалар да жоқ емес. Олай дейтінім, мен өзім 14 жыл болды баспанада жұмыс жасаймын. Бұл өз қызығы мен шыжығы мол шағын ғана мекеме. Ол жұмыс істей бастағалы қаншама жасөспірім балаға пана, қорған болды. Себебі мұнда ата-анасының қамқорынсыз қалған жетім балалар келіп жатады. Келген әрбір бала мұнда әлеуметтік, психологиялық, медициналық көмек алады. Дегенмен бұл балаларға ең қажеті - ата-ана мейірімі, отбасы жылуы. Ал осында жұмыс істейтін адамдардың әрқайсысы оларға келген күннен бастап бірі анасындай, бірі тәтесіндей қамқорлық көрсетіп, отбасылық жылу беруге күш салып жүрген жайы бар.

Олардың бойына отбасылық құндылықтарды сіңіре отырып тәрбие береді. Бір шаңырақ астындағы әр отбасынан келген балалар бір үйдің баласындай тату-тәтті, бірі үлкен, бірі кіші болып өмір сүріп жатады.

Бесіктен белі шықпай жатып, тағдырдың сынына түскен балаларды өмір сүруге үйрету, оларды сүйіспеншілікке, мейірімділікке тәрбиелеу, отбасылық сезімдерін ояту біздің еншіміздегі міндет. Ол үшін мұндағы әр баламен жас ерекшелігіне байланысты жұмыстар жүргізіледі. Қандай жағдайда өмір сүрсе де, не себеппен келсе де олар үшін ең бастысы ата- ана, отбасы. Мүмкіндігінше олардың ата-анасымен, туыстарымен байланысын үзбей, кездесіп тұруларын ұйымдастырамыз. Мекемемізде теріс жолға түскен ата-аналарға, отбасыларына  қолдау беру, көмек көрсету қызметі жұмыс жасайды. Онда ата-аналарға кеңестер беріліп, әлеуметтік көмек көрсетіледі.

Осы мерекеге орай біздің мекемемізде «Отбасы – Отанымыздың болашағы» атты мерекелік шара өтті, балалардың өз жанұясы туралы, армандары туралы салған суреттерінен көрме ұйымдастырылды.

Осындай мереке күні әрбір отбасында тек татулық, бірлік, береке, сыйластық, сүйіспеншілік болсын! Әрине адамдар тек бұл күні ғана емес, әрбір сағат, әрбір минут сайын отбасын шексіз махаббатқа бөлеуі тиіс. Қоғамымызда әр бала тек өз  отбасында бақытты өмір сүрсе екен!? Өйткені бала біздің болашағымыз, Отанымыздың болашағы.

А. Әбділдә,
«Арқалық балалар мен жасөспірімдерге арналған баспанасы» КММ-і тәрбиешісі.