Таяуда облыс әкімі Нұралы Садуақасов «Жұмыспен қамту-2020» бағдарламасының үшінші бағыты бойынша ата-ананың қамқорлығынсыз қалған 26 балаға Рудный қаласынан пәтер кілттерін табыстады. Пәтерге ие болғандардың екеуі Арқалық қаласының тұрғындары Досхан Өтегенов және Нағашыбай Ерсалин.

Олар қоныстанған Рудный қаласындағы үй осыдан он жыл бұрын тастанды үй болған. Қала тұрғындары өз араларында бұл үйді «Титаник» деп атап кеткен екен. Бүгінде сол тастанды үй толық жөндеуден өтіп, көптеген жанға қуаныш сыйлады.

Қостанай облысы әкімдігінің жұмыспен қамтуды үйлестіру және әлеуметтік бағдарламалар басқармасына қарасты Арқалық қалалық жұмыспен қамту орталығының құрылғанына аз уақыт болса да бүгінде бағдарлама аясында жасап жатқан жұмыстары ауыз толтырып айтарлық.

Орталықтың маманы Бақытжан Қауметовтың айтуынша, бағдарлама шеңберінде Арқалық қаласынан 29 бала іріктеліп соның бесеуі барған. Және де жетеуінің құжаты резервке қойылған. Дегенмен пәтерге қаламыздағы политехникалық колледждің бұрыңғы (№2 кәсіптік лицей), сондай-ақ, Арқалық көпсалалық колледжінің түлегі Досхан мен Нағашыбай қол жеткізді. Бұл да болса түлектер үшін аса қуанатын жағдай. Себебі олар аяқтаған мамандықтары бойынша жұмысқа орналасып, армандарының орындалуына мүмкіндік туды.

 Жоғарыда атап өткен үшінші бағыт деп отырғанымыз, Қазақстан Республикасы азаматтарының өз еркімен көшуіне жәрдемдесу есебінен еңбек ресурстарының ұтқырлығын арттыру шараларын көздейді. Қаламыздың жұмыспен қамту орталығының осы бағыттағы жүйелі жұмыстарының арқасында пәтер кілттеріне ие болған жандарды құттықтай отырып, болашақта шапағаты мол жобаның жалғасы болатына сенімдіміз.

Фото http://nurotankostanay.kz сайтынан

Б. АЖИМУХАНҚЫЗЫ