Қыс жақындағанда қыза бастайтын әңгіменің бірі – жылу мен мазут мәселесі, әсіресе, биыл көптеген алып-қашпа әңгімелерге ұласып жатыр. Тақап келе жатқан қыс айларында Арқалық жылусыз қалатыны рас па деген сауал бәрімізді де мазалай бастағаны шындық. Оның сыртында, Арқалық қала мәртебесінен айырылып, «қала типіндегі поселкеге» айналады екен деген қауесет те тез тарап кетті. Жел тұрмаса, шөптің басы қимылдамайды. Мұндай сөздің тарауына не себепші болды әрі бұл қаншалықты шындыққа жанасады?

Әрине, бұл әңгімелерін шығу төркінін нақты талдап-тарқатып беру қиын. Бірақ, жақында у-шу болған мәселенің бірі – Арқалық перзентханасының қайта құрылуы түрткі болды деп болжам жасауға болады. Себебі, бүкіл аймаққа қызмет көрсетіп отырған перзентхананың жабылуы – қаланың мәртебесі төмендейді дегенді меңзеп тұрғандай. Әйтсе де, ПГТ болудың қаупі төніп тұрғанын өзге де проблемалық тұстармен байланыстыра беруге болады. Бұл орайда әңгімеге не арқау болғанын дөп басып айту мүмкін емес.

Дегенмен де, жақында осы мәселе бойынша әкімдіктегі ресми жиналыста сөз қозғалды. Арқалық қаласы әкімінің міндетін атқарушы Ерлан Теменов Арқалық ПГТ болады деген әңгіме негізсіз екенін айтты. Жиналыс барысында Е. Теменов облыс әкімінің кеңесшісі Виктор Мейстердің пікірі бойынша, Арқалықты ПГТ қылу «жоғарғы» жақта сөз болмағанын айтып, көңілімізді көншіткендей болды.

Соңғы күндері қала жылусыз қалуы мүмкін, қысқа дайын емес деген әңгіме де жиілеп кеткені рас. Бұған не себеп болды деген сауалға нақты жауап беру де оңай емес. Не болса да, қысқа дайындық өз кезегімен жүріп жатыр екен. Бұны да әкімдіктегі жиналыста білдік. Оқырмандардың есіне салар болсақ, жыл сайын Арқалыққа республикалық бюджеттен жүздеген миллион қаражат бөлініп отырады. Аса қымбат отын – мазутты сатып алуға қыруар қаражат биыл да қажетті мөлшерде, яғни 800 миллион теңгеден астам көлемде бөлінді. Е. Теменовтың мәлімдеуі бойынша, операторлар мен қызмет көрсетушілермен тиісті келісім-шарттарға қол қойылды. Келісім бойынша Арқалыққа жылу беру маусымы жақындағанда 27 мың тонна мазут отыны жөнелтіледі. Өткен жылдан 1,3 мың тонна мазут қалғанын ескере отырып, биыл қыстап шығуға отын жетіп артылатынына көз жеткізуге болады.

            Қайрат ЕСМАҒАНБЕТОВ