Жуырда, яғни 4 қазан күні өз уақытын аямайтын, өзгенің бақытын аялай білетін  ұлағатты ұстаздардың күні аталып өткен болатын. Ғалым да, ақын да бас иетін, ерекше қасиетке ие ұстаз деген ұғымға не арнасақ та артық емес. Осыған орай облыс орталығында мереке қарсаңында ұстаздар ұлықталып, Арқалық қаласынан барған Торғай аграрлық-техникалық колледжінің мұғалімі Назыгүл МАЖИТОВА облыс әкімінің қолынан Қазақстан Республикасы Білім беру ісінің құрметті қызметкері белгісін тағып қайтты.

Айта кету керек, облыс бойынша 240-қа тарта мұғалім қатысқан бұл мерекелік жиында 10 ұстаз арнайы грамотамен марапатталса, жоғарыда аталған белгіге тек Назыгүл Жалғасбекқызы ие болған.

Ұстаздық жолда жиырма үш жыл тәжірибесі бар  Назыгүл Мажитова  мектепте бір жыл ғана жұмыс жасап, қалған жиырма екі жылда дәл осы Торғай аграрлық-техникалық колледжінде қызмет атқарып келеді. Ұяңдық пен инабаттылықты бойына жарастыра білген ұстаз бүгінгі күнге дейін электрик мамандығы бойынша тоғыз топ, механик, технолог мамандығы бойынша екі топ студенттерді тәрбиелеп, өмірде өз жолдарын табуға  маңдай терін төккен. Бүгінде еңбегі еленіп жатқанына ұлағатты ұстаз әрине  дән риза.

Сұхбат барысында «Ұстаздар отбасынан шығып, ұстаздар отбасына түстім» деп, ақырын ғана жымиған Назыгүл Жалғасбекқызының сөзі тегін айтылмағанын түсіндім. Өз анасы Ы.Алтынсарин атындағы медальдың иегері, ұстаз Күлжанова Мендыгүл Үкітайқызынан тәрбие алған Назыгүл, 40 жылдан аса мұғалім болып еңбек еткен, жоғарыдағы Ы.Алтынсарин атындағы медальдың иегері Уәлихан Мажитовтың келіні атанады. Қаламыздағы Ш.Уәлиханов атындағы №1 мектептің негізін қалаған Уәлихан Мажитовты танымайтын адам кемде-кем. Бұл  орайда «Ұстазы жақсының ұстамы жақсы» деген халық даналығы осы отбасыға арналғандай.

Тәуелсіз ел атанып, төбемізге ту тігіп, тіліміздің мәртебесі артып жатқан кезде елдің болашағы – жас ұрпақ тәрбиесіне де көңіл бөлінуі қажет. Сол себепті бүгінгі жастар өнерлі, білімді, тәрбиелі, саналы болып тәрбиеленуі үшін маңызды орта ең алдымен – мектеп десек, мектептің басты тұлғасы, жүрегі – Ұстаз. Ұрпақ болашағы, халқымыздың келешегі – ұстаздар қолында. Сондықтан, бүгінде ұшан-теңіз еңбек пен, төгілген маңдай тердің жемісін көріп отырған Назыгүлдей ұстаздардан тәрбие көрген жас ұрпақтың алар асуы мен шығар биігі мол болатыны сөзсіз.

Баян БАБАСОВА