Осыдан бірер күн бұрын ақылға қонымсыз қылмыс жасалды. Қала шетіндегі поселкеде тұратын екі ағайынды өзара араздасып, ақыр аяғында кішісі ағасын пышақтап өлтірді.

Арқалық қаласы Ішкі істер басқармасының берген мәліметтері бойынша, 1975 жылғы Н. мен 1966 жылғы Б. деген екі ағайынды азамат иесіз қалған ғимараттың жертөлесіне түсіп, бірге отырып арақ ішкен. Ағайындылар өзара келіспеушіліктің салдарынан бір-бірімен жанжалдасқан. Нәтижесінде Н. Б.-ның сол жақ құлағының маңайын екі рет пышақпен тіліп өткен. Ауыр жарақат алған Б.-ның миына қан құйылып, сол жерде мерт болған. Қылмыс орнында ас үй пышағы, «Русский стиль», «Черный орел» арақ бөтелкелері және т.б. ұсақ-түйек заттар табылған.

«Інісі бардың – тынысы бар, ағасы бардың – жағасы бар» деп ағайындылар арасындағы сыйластықты, бауырмалдылықты дәріптеп өткен халқымыздан да осындай төбе шашың тік тұрар қылмысқа дәті барған адам шыққанына шошисың. Қылмыстың басым көпшілігі, тіпті осындай жан түршігерлік қатыгез оқиғалар да – адамның сана-сезімін улап, адамгершіліктен жұрдай қылатын ішімдіктің салдарынан екеніне тағы да көзіміз жеткендей...

«Торғай ақпарат»