Елбасымыздың жыл сайынғы халыққа Жолдауындағы күн тәртібіндегі кезек күттірмейтін өзекті мәселелердің бірі әрі бірегейі - білімді ұрпақ тәрбиелеу болып отыр. Егемендік құқықтарымызды негізге ала отырып, «Қазақстанның келешегі – білімді ұрпағында» деп мәлімдеген Елбасымыз жас ұрпақтың жарқын келешегіне орасан зор сеніммен қарайтынын білдірді. Елбасының осы сөзі «Мен жастарға сенемін» деген Мағжан жырларымен тап бір үндесіп жатқандай.

«Мектеп – кеме, білім – теңіз». Сол теңізде әркім әрқалай «жүзеді». Бірі білім айдынында айды аспанға шығарып, ел болашағының кемелдігіне сүбелі үлес қоспаққа талпынса, енді бірі «дайын асқа тік қасық» болуға әзір-ақ. Ол ол ма, 11 жыл мектеп қабырғасында алған білімді жүйелі түрде тексеру, яғни Ұлттық Бірыңғай Тестілеу – өз алдына жеке бір «роман».

«Еліміздегі ең адал министрлік» деген бағамызды ақтамай, ел қаражатының бірнеше миллионын жымқырып, тағы бір министр ағамыз кете барды. Білім саласындағы шетсіз-шексіз реформа өзі ақсап тұрған білім жүйесіне тың өзгеріс әкеле ме, әлде керісінше, «жығылған үстіне жұдырық» бола ма? Бұл сұрақтарға нақты жауап бере алуымыз екіталай.

Қоғамда «білімді ҰБТ арқылы тексеру - сәтсіз форма» деген пікір қалыптасқалы қашан. Осы факттерге сүйене отырып, 2015 жылдан бастап мектеп оқушыларының білімін екі этапты жүйелі тексеру енгізілді. Нақтылап айтсақ, біріншісі – мектеп аттестаты үшін, ал екіншісі – жоғарғы оқу орнының студенті атанғысы келетін абитуриенттер үшін болмақ.

Мен – Ыбырай Алтынсарин атындағы гимназияның 10-сынып оқушысымын. Болашақта әл Фараби атындағы Қазақ Ұлттық Университетінің «PR-менеджмент» факультетінің студенті атанғым келеді. Басты мақсат – грант иегері атану. Асқақ армандарым мені алысқа жетелейді, күн сайын білімімді толықтырып, игерген білімдеріммен ұштастырамын, білмегенімді білуге асықпын. Дегенмен, көңілімдегі бір күмән ертеңгі күнге деген сенімімді сейілткісі келетіндей. Ол – осы білім саласындағы олқылықтар.

Ендігі жерде ел жастарының болашағына алаңдайтын шын жанашыр ағаларымыз қоғамда орын алған толқуларды басып, білім жүйесін бір қалыпқа келтірсе екен деп тілеймін. Қазақстан – өте бай мемлекет. Маман тапшылығы айқын сезілетін салаларда өзіміздің қазақтың қара домалақтары мен қара көздері қызмет етіп, біреудің «қаңсығына таңсық» болмай, әлемнің бәсекеге қабілетті елдерінің алдыңғы қатарына қосылар күн алыс емес екеніне сенімдімін.

Самал МҰРАТОВА,

Ы. Алтынсарин атындағы гимназияның 10 сынып оқушысы.