Қазақстан Республикасының Президент күніне арналған, "Мәдени мұра" бағдарламасын жүзеге асыру мақсатында қазақтың халық шығармашылығы өнерін дамыту, жаңа заманға сай насихаттауды басты бағдар еткен қалалық Мәдениет сарайының ұйымдастыруымен "Халық сазы" байқауы болып өтті.

Онда қаламыздың өнерпаз жастары халқымыздың сан ғасырлар бойы үзілмей, күні бүгінге дейін жеткен өнер түрлері бойынша сынға түсті. Атап айтсақ, терме, дәстүрлі ән, күй номинациялары бойынша өзара бәсекеге түсті. Қабілетті балалардың өнерін сараптау қазылар алқасының мүшелері – ҚР мәдениет қайраткері Боранбай ӘБЕНОВКЕ, өткен жылғы байқаудың жеңімпазы Айбат МАРАТОВҚА, Құрманғазы атындағы Қазақ ұлттық консерваторияның түлегі, ТГК оқытушысы Нұрбол ЖАТҚАНОВҚА жүктелді.
Бірнеше кезеңмен өткен байқаудың қорытындысы бойынша, әр номинацияның жүйріктері анықталды. Олар: терме бойынша 1 орын Хафиз Қайроллаға, 2 орын Нұрдаулет Тойшинге бұйырды. Екеуі де АрқМПИ студенті. Халық  әні бойынша ең үздік - Н.Құлжанова атындағы Торғай гуманитарлық колледжінің білім алушысы Азамат Сейтжан атанды. 2 орын Марат Мәдиге, 3 орын АрқМПИ студенттері Өркен Айқын мен Ажар Қасымханға берілді.
Күй номинациясында жеңімпаздардың барлығы да Н.Құлжанова атындағы Торғай гуманитарлық колледжінің білім алушылары болды. Атап айтсақ, 1 орын Әлішер Есенжоловтың, 2 орын Әділхан Сұлтановтың, 3 орындар Нұрдаурен Дихан мен Нұржан Қанафиндердің еншісіне тиді.

«Торғай-ақпарат»