Таяуда Павлодар қаласында бокстан қыз балалар арасында Қазақстан республикасының Олимпиадаға даярлау орталығына іріктеу жарысы болып өтті. Осы жарысқа қаламыздағы БЖСМ-нен қатысқан Жанна СЕРІКОВА 54 келі салмақ бойынша жарыс жеңімпазы атанып, алтын медальмен оралды.

 Жаннаның бокс спортына қызығуы бірден қалыптаспады. Бірақ, бұған оның қазір өкпесі де жоқ. Оқушылар бойындағы спорт түрлеріне бейімділік тез арада көзге түсе бермейтіндігі белгілі. Жанна бастауыш сыныптарда қозғалыс ойындарын жақсы меңгерді. Өзінің ширақтығы, батылдығы мен ептілігі қатарластарынан озық көрінетін. Ал, он жасынан бастап, оның осы қасиеттерін анық байқаған, №1 орта мектептің дене тәрбиесі пәнінің мұғалімдері: Қанат, Кенжеболат, Нұрлыбек ағайлары, күнделікті волейбол, баскетбол ойынына және жеңіл атлетика спортына дайындай бастады. Ол осының арқасында шыныққан үстіне шыныға түсті. Талай спортшыларының қатарында тұрды.

Әсіресе, мектеп оқушыларының жылма-жыл өтетін қалалық кросқа жүгіру жарысында бірнеше рет жеңімпаз болды.

Соның арқасында облыстық жарыстарға қатысып, көзге түсті. Енді, міне, осыған жаңалықты қосылған спорт түрі-бокстан да бәйгемен оралуы жоғарыдағы ағайларын, өзі оқитын мектебін қуантуда.

Боксшылардың жаттығу залында бапкерлер: Марат Сейтмағанбетов, Рашид Байменовке жолығып, табыстарымен құттықтап, жарыстың өту деңгейін сұраған едім. Жарысқа баптап апарған Марат ағайы үлкен қуанышын жасырмастан, сөз бастады.

-Қазіргі таңда Қазақстанда жасөспірімдерді Олимпиадаға даярлау орталығына іріктеу жолға қойылып келеді. Бұл үлкен додаға облыстардан: Ақмола, Алматы, Оңтүстік Қазақстан, Солтүстік Қазақстан, Шығыс Қазақстан, Қостанай, Қарағанды және қалалардан: Астана, Алматы, Орал, Тараз, Павлодардың командалары қатысты. Шаршы алаңдағы бәсекеде 160 боксшы бақ сынасты. 54 кг салмақта облыс командасының атынан шыққан, біздің боксшымыз Жанна Серікова 1999 жылы туған, 10 сынып оқушысы. Оның салмағында осы жолы 14 боксшы болды. Жанна соның төртеуімен шаршы алаңда кездесті. Олар: Павлодар, Шымкент, Өскемен, Қостанай қаласының былғары қолғап шеберлері. Шәкіртіме ризамын. Ол соңғы үш қарсыласын 3:0 есебімен айқын басымдылықпен жеңді. ӨЗ шеберлігін толық деңгейінде көрсетті. Қорытындысында бірінші орын алып, ҚР Олимпиадаға даярлау орталығына қабылданды.

Осы жарыстағы бәсекелерді бастан аяқ ҚР-ның аға жаттықтырушысы бақылаған болатын. Жанна Серікова бірауыздан өзінің жеңісін баршаға мойындатты. Ол енді 10.12-25.12 аралығында Павлодар  қаласында өтетін оқу-жаттығу жиынына барады.

Жанна жарыстан алған әсерін былай сипаттады:

-Қарсыластарымның осалы болған жоқ. Сегіз ай көлеміндегі дайындықтан кейінгі болған, осы жеңісімен сондай қуаныштымын. Менің боксқа келуім-осы жылдың сәуірі. Онда да қызығуыма себепкер болды деп, сыныптастарым Нұрай, Әлиді айтар едім. Олардың бұл спорттан тәжірибелері мол. Қыз балалар да осы спортқа көптеп келуге шақырамын.

Иә, қайсарлықты жанына серік еткен Жаннадай қыздарымыздың саны көбейе берсін. Жеңісті жолдары жалғасын!-деп тілейік.

 Сейтқали Оташев