Қаламыздың спорт саласында жыл сайын қомақты жетістіктерімен қуантып келе жатқан спортшылардың бірі – ауыр атлеттер екені даусыз. Жуырда республикалық чемпионаттан жүлдемен оралған Ерболат БАЛҒАБАЕВ – осы сөзімізге дәлел.

Жалпы Арқалықта ауыр атлетика топшысын қатайтып, қанатын кеңге жайып келе жатқаны байқалады. Жаттықтырушы Күнтуар ЖАНКИШЕВТІҢ қарамағындағы ер балалар бірнеше жарыстарға қатынасып, туған қала қоржынын түрлі медальдарға толтырып келеді. Жеңіске деген жігері таусылмай жүрген осындай зілтемірші балуанның бірі – Торғай гуманитарлық колледжінің білім алушысы Ерболат Балғабаев. Осыдан 6 жыл бұрын осы спортқа аяқ басқан жас спортшы бұған дейін де талай облыстық, республикалық додаларда күш жарыстырып, бірталай жүлдеге қол жеткізген. Бүгіндері спорт шебері.

Ерболат бұған дейін талай жарыстан топ жарып шыққан. Әйтсе де, жас спортшыға республикалық дәрежедегі сайыста жүлдеге қол жеткізу бұйырмапты. Тамыздың таяу күндерінде Көкшетау қаласында өткен 20 жасқа дейінгі жасөспірімдер арасындағы ҚР чемпионатында «балғадай» балуанның бағы жанды. Ең тартысты өткен салмақ дәрежесі – 77 келіге дейінгі салмақта 19 спортшы күш сынасса, оның 12-сі спорт шебері екен. Барлығы да өз өңірлерінің үздіктері. Қостанай облысының құрама командасынан барған Ерболат қоссайыс нәтижесінде айтарлықтай нәтиже көрсетіп, жүлделі ІІІ орынға ие болды.

Жаттықтырушы Күнтуар ЖАНКИШЕВ,
жүлдегер Ерболат БАЛҒАБАЕВ,
Арқалық БЖСМ директоры Рүстем ШАЛАБАЕВ,
жас атлет Ерасыл КЕНЕСБАЕВ.     

Бірінші орынға жетуге небәрі үш-төрт келі жетпей қалды. Бірақ, бапкері де, спортшының өзі де бұл жеңісті қанағат етуде. Себебі, үшінші орын да – жақсы жетістік. Оған қоса, Ерболат қоссайыста үшінші орынға көтерілсе, жұлқа көтеру сайысында ІІ орынды иемденіп қайтты. Бұл сайыста ол 167 келі штанганы бағындырды. Серпе көтеруден 124 келі көтерді. Қоссайыста 291 ұпайды еншіледі.

Бүгінгі таңда Ерболат қараша айында өтетін республикалық дода – 23 жасқа дейінгі Қазақстан Республикасының чемпионатына дайындалу үстінде. Оған Арқалықтың үздік спортшылары іріктеліп, жебірелмек.
Жеңіс – еңбек пен маңдай тердің жемісі. Бұл қағида, әсіресе, өз салмағынан бірнеше есе ауыр зіл темірді көтеріп, бейнетпен биік белестерге жетуге талпынып жүрген ауыр атлеттер үшін арнайы айтылғандай. Бүгінгі жүлдегер спортшыны, жалпы барша спортшылар қауымын Спорт күнімен құттықтай отырып, қажымас қайрат, таусылмас жігер тілейміз. Еңбектеріңіз жемісті, жарыстарыңыз жеңісті болсын!

Қайрат
ЕСМАҒАНБЕТОВ