«Мен жастарға сенемін» деп Мағжан Жұмабаев айтқандай, елдің ертеңі егеменді елдің болашағы үшін қызмет етер жастарымызбен тығыз байланысты. Мемлекет керегесінің кеңдігі, уығының беріктігі өскелең ұрпақтың ұлтжандылығы мен туған елге деген сүйіспеншілігінің жемісіндей.Тәуелсіздікті көксеп, жас жанын бәйгеге тіккен кешегі «Желтоқсан уақиғасында» Отанға деген сүйіспеншілікті алдыңғы аға буын дәлелдеп берген. «Ақыл жастан, асыл тастан» деген қазағымыздың даналық дәріптеуі тағы бар. «Атадан ұл туса игі, ата жолын қуса игі» деп ата –бабаларымыздың салған кең даңғыл жолымен жүруімізді көксеген арман-мұратымыз өз алдына.

Ендеше ұлт болашағын ойлар жастарымыздың аяқ алысын байқайық, жүрек түкпіріндегі болашақ жайлы бағамдаған пікірімен бөлісейік деген мақсатпен «Жастар бастамалар орталығы» төрағасымен сыр-сұхбат жасауды жөн көрген едік.

Дархан Жоламанұлы – сізді жастармен қоян-қолтық жұмыс жасай білетін азамат ретінде қала халқы біраз танып үлгірді. Осы салада қызмет жасауыңызға не түрткі болды. Ойларыңызбен бөлісе отырсаңыз.

- Мен мектеп жасымнан осындай жұмысқа бейімделдім. Негізгі себеп - Родина ауылының орта мектебінде оқып жүргеннен пайда болды. Қалалық қосымша білім беретін орталықта «Зерде» клубы жұмыс жасайтын. Көбіне әртүрлі тақырыптарда интелектуалдық ойындар өткізіледі. Ерекшелігі - оқушыларды ізденімпаздыққа баулиды. Арнайы мектебіміздің атынан қатынасқан соң, өзіме талап қоюға үйрендім. Бұл жерде ерекше айтып өтетін жағдай -  осы клубқа жетекшілік жасайтын Ләззәт Әбдешқызы да қабілетімізді ашу барысында көп еңбектенетін. Ерекше тапсырмалар беріп, қабілетім жететіндігін де мақтанышпен атап өтетін. Осы тұрғыда ұстаз ретінде дұрыс бағыт-бағдар бере білгендігі үшінде ол кісіге шексіз алғыс білдіргім келеді. Орталығымыз 14-29 жастар аралығындағы жастарды қамтиды.

- Жастар орталығының жұмыс жасайтын бағыттарымен таныстырып өтсеңіз.

- Жастар орталығы «Нұр Отан» партиясының ізбасары «Жас отан» жастар қанатымен бірлесе жұмыс жасайды.
1-ші бағыт: «Интелектуалдық бағыт» жастардың арасында әр түрлі сұрақтар, ойындар өткізу деп айтуымызға болады. Бұл тұрғыда басты мақсат жастарымызды өз ойларын ашық айта білуге баулу. Пікір таластырып қана қоймай, өмірге дұрыс көзқарас қалыптастыру негізге алынған. Осы бағытта жұмыс жасау нәтижесінде қала жастары арасында «Білім берудің онлайн жүйелері», «Әліппиімізді латын әріпіне көшіру», «Ауыл әкімдерін сайлау жүйесі» және тб. пікірталастар ұйымдастырылды. Жастардың ойлай білуін, өз ойын ақылға қонымды денгейде жеткізе білуін, бір жағынан сөз мәдениетіне тәрбиелейді.
2-ші бағыт: Азамттық қоғамның белсенділігін арттыру. Жастардың бос уақыттарын мағыналы өткізу. Жастардың бойына патриоттық сезім дамыту. Осы орайда, мысалыға айта кетейін, 9 мамыр «Жеңіс» күнін атап өту барысында жастарымыз ардагерлердің үйлеріне өз еріктерімен барып, аулаларын күл-қоқыстан тазартып, абаттандыру жұмыстарымен айналысты.
3-ші бағыт: Дарынды жастарды қолдау, болашағына жол ашу.
4-ші бағыт: Мемлекеттік жастар саясатын дамыту. Жылма-жыл Елбасы бағдарламасына сәйкес жұмыс жасау. Мысалы: «Дипломмен ауылға», «Жастар тәжірибесі», «Жасыл ел», «Болашақ бағдарламасы. Негізгі жұмысымыз осы бағдарламаларды жастарға тәптіштеп түсіндіру, ұғындыру. Жастардың көбісі «Дипломмен ауылға» барғанда үкімет тарапынан жасалатын жеңілдіктерді біле бермейді. Пайызсыз несие, тұрғын үймен қамтылу дегендей.

- Осы бағытта жеткен жетістіктеріңіз жөнінде де айта кетсеңіз.

- 2012 жылы Тамыз айында 5-ші облыстық Үкіметтік емес ұйымдар байқауында «Азаматтық бастамаларды қолдау саласында» номинациясының жеңімпазы ретінде Қостанай облысының әкімі Нұралы Сәдуақасовтың арнайы дипломымен марапатталдым. Облыс бойынша 500-ден астам ұйым бар. Атқарған істері жөнінде барлығы есеп беріп отырады. Бұл жетістікті өзім жоғары жетістік деп есептеймін. Осындай бір жетістік Арқалық қалалық жастардың «Алтын кітабына» есімім енді. Мұны жергілікті басшылықтың еңбегімді елеп ескергені деп білемін.

- Жеткен жетістіктеріңіз үшін, қуанышыңызға ортақпын. Болашаққа қандай жоспарларыңыз бар, осы жөнінде баяндап берсеңіз?

- 4-ші Маусым күні мемлекет рәміздерінің 21 жылдығын атап өтуді жоспарлап отырмыз. Қостанай облыстық оңтүстік өңірлерде «Мемлекеттік тілде жастар бастамаларын дамыту» жобасымен орталық құру. Арқалық қаласының маңайындағы ауылдарда жұмыс жасап жүрген жастармен дөңгелек үстел өткізу жоспарлануда. Негізгі мақсат әр ауылда халық қалаулыларының көмекшілерін дайындау іс-шаралары жоспарлануда.

- Сізге соңғы сауал. Өскен ортаңыз, ата-аналарыңыз жөнінде айта кетсеңіз?

- Негізі қарапайым жанұяда тәрбиелендім. Әкем «Қостанайоңтүстікэлектросервис» МКК-ның қызметкері. Анам ауылдық почтада жұмыс жасайды. Жанұяда 4 бала, мен тұңғышымын. Үйленгенмін, жарым Күнсұлу Алмасқызы, студент, болашақ ұстаз. Жасым 23-те.

- Сұхбатыңызға көп-көп рахмет, егеменді еліміздің келешегі үшін еселеп еңбек сіңіріп, табыс биігінен көріне беріңіз.

Сұхбаттасқан
Бағила Балмашева.