Ел егемендік алғалы, көптеген тарихи тұлғаларымыздың есімі қайта жаңғырып, ұрпақ санасына жеткізіліп келеді. Елжанды азаматтардың арқасында өткен жылдары ұлт ұстазы Ахмет Байтұрсынұлының, Кейкі батыр Көкембайұлының, оған дейін Аманкелдінің ескерткіштері орнатылса, міне, бүгін, қаланың 57 жылдығына орай осы өңірдің тумасы, аты қазақ баласына мәшһүр батыр, Кенесарының сардары Жәуке Назарғұлұлының ескерткіші бой көтерді.

Батырдың бюсті темір жол вокзалының алдындағы шағын саябақта орнатылды. Енді батырдың сом бейнесі қалаға аяқ басқан сәтте алдыңнан табылып, осы өңірдің тарихынан сыр шертетіні сөзсіз. Ескерткіштің ашылу салтанатында қала әкімі Ғазиз Бекмұхамедов сөз сөйледі. Жәуке батыр сияқты тұлғалар халқымызға тән қайсарлық мен өжеттіктің символы екенін айта келе, қала басшысы осындай тағылымды істің басы-қасында жүрген демеуші – Хисамедин Рамазанұлы Сапарғалиевке Алғыс хат табыс етті. Әкім Алғыс хатында батырдың ескерткіші – қаламызға тамаша тарту болғанын айта келе, өскелең ұрпақты тәрбиелеуде маңызы зор екенін білдірді.

Ескерткіштің авторы – осы өңірге есімі белгілі мүсінші, «Құрмет» орденінің иегері Әбілбек Ұзақов. Жәуке батырдың ескерткіші – мүсіншінің қаламызда жалғыз еңбегі емес. Ол бұған дейін де жоғарыда атап өтілген тарихи тұлғалардың бейнесін «тірілткен».

Бюсттің ашылуында қаламыздың аға буын өкілдері, батырдың ұрпақтары сөз алып, Жәуке Назарғұлұлының өмір деректеріне қысқаша шолу жасады. Ресей империясының отаршылдық саясатына қарсы шығып, күреске толы ғұмыр кешкен батырдың ел арасына аңыз боп тараған ерліктері баяндалып, жиынның соңы концерттік бағдарламаға ұласты.

Қайрат ЕСМАҒАНБЕТОВ