Тұңғыш Президент күніне орай жас ақындар айтысы биыл екінші рет өткізіліп отыр. Мәдениет сарайының ұйымдастыруымен өткен бұл мәдени іс-шараға тек қаламыздан ғана емес, көршілес аймақтардан келген де жас ақындар қатысты. Атап айтсақ, барлығы үш жұп айтысты.

Қазақтың ауыз әдебиетінде ерте заманнан келе жатқан айтыс жанры күні бүгінге дейін өз беделін, қоғамдағы орнын жоғалтпай келеді. «Бас кеспек болса да, тіл кеспек жоқ» деп, айтыс ақындары қай уақытта да өз заманының сыншысы болғаны баршаға аян. Жалпы, айтыс ақындары қоғамдағы қандай да болсын құбылыстарды жырға қосып, халықтың көкірегіне қондыра білуімен, жетістіктерін жырлап, кемшіліктерін қамшылай білуімен ерекшеленетін өнер иелері. Әрине, кездейсоқ адам айтысқа бара бермейді. Бұл синкретті, яғни көп салалы өнер жолына түсу үшін ең әуелі табиғи талант қажет болса, екіншіден сахналық, вокалдық қабілеттердің иесі болу шарт. Осындай күрделі өнерді игеруге талпынған жастар арамызда да бар екенін «Ұлт көшбасшысы» атты мерекелік додада байқадық.

Атап айтсақ, айтысқа көршілес Аманкелді ауданынан Балтазар Тұрысбекұлы мен Сералы Балтабай атты қос жас айтыскер арнайы ат шаптырып келіпті. Сондай-ақ, додада танымал айтыскер ақын Айбек Қалиевтің төл шәкірттері, АрқМПИ студенттері Рауан Терек, Батырлан Сағынтай, Шыңғыс Кенжалиев және т.б. бағын сынады.

Жас ақындардың суырып салмалық қасиетін, жырларының көркемдік және мазмұндық жағынан саралаған қазылар алқасында ақындар Молдатай Жапаров, Мұрат Жүнісұлы, ҚР мәдениет қайраткері Жұмағали Өмірбек сияқты аға буын өкілдері болды.

Бірнеше сағатқа созылған додада «Ұшқырлы ой, ұтымды жауап» номинациясына аманкелділік Сералы Балтабай ие болса, ІІІ орын АрқМПИ студенті Рауан Терекке, ІІ орын былтырғы айтыстың жеңімпазы Батырлан Сағынтайға, І орын Аманкелді ауданының ақыны Балтазар Тұрысбекұлына бұйырды. Ұйымдастырушылар жеңімпаздарға өздерінің бағалы сыйлықтары мен Алғыс хаттарын табыстады, ал қазылар алқасы жас ақындарға ағалық ақыл-кеңестерін айтып, шығармашылық табыс тіледі.

Қайрат ЕСМАҒАНБЕТОВ