Арқалық мемлекеттік педагогикалық институтында бүгінгі қоғамымыздың өзекті мәселесі - әйелдерді зорлық-зомбылықтан қорғау тақырыбын өзек еткен Дөңгелек үстел болып өтті.

Бүгінгі таңда әйелді зорлау, қиянат көрсету сияқты сорақылықтардың жиілеп кеткені жасырын емес. Ел жаңалықтары адам шошырлық оқиғаларға толы. Бәзбіреу жаңа туған нәрестесін қоқыс жәшігіне лақтырып кетсе, енді біреу 10-15 жасар қызды зорлап кетіп жатыр. Жұбайын ұрып-соғу, адамды құлдыққа сатып жіберу деген сияқты хабарлар да үйреншікті жағдайға айналып барады. Осындай қоғамдағы кері құбылыстың себеп-салдары қайда жатыр?
Алысқа бармай-ақ, Арқалықты алайық. Былтырғы жылдары қала тұрғыны өз бауыр еті – балаларының анасын балконнан лақтырып жібергені елді елең еткізген еді. Ал, отбасында өз зайыбынан қысым-қиянат көріп жүрген нәзік жандылар қаншама. Мұндай айуандыққа итермелейтін басты себеп ішімдік екенінде талас жоқ.
Қыз балалардың ашық-шашық жүруі, ішімдікке, темекіге әуестенуі – батыстың феминизм, эмансипация сынды құбылыстарының жемісі. Әйелдің құқығы ер адамдармен тең болса да, физиология жағынан ерекшеленетіні ұмыт қалғандай. Нәтижесінде, сыраны суша сімірген сұлулар мен көк түтінмен көркіне көр қазған қыз-келіншектерді көрсек – бей-жай жүре береміз.
Әрине, әркім өз өмірінің қожайыны. Оның үстіне ХХІ ғасыр деп ақталамыз. Бірақ тәрбиенің осалдығынан, адами құндылықтардың жоқтығынан біздің қаламызда да талай ұят нәрселер болып жатыр. Күні кеше кәмелетке толмағандардың құқығын қорғау жөніндегі комиссия отырысында қала мектептерінің бірінде 14-жасар қыз жүкті болғаны сөз болды. Ал, жасанды түсік жасатуға мәжбүр болып жүрген қаракөздеріміз қаншама.
Дәл осындай алаңдатарлық әрі ауқымды тақырыпқа арналған жиында қала әкімінің орынбасары Е. Мәметеков, қалалық сот судьясы Ләззат Нұрханқызы, Арқалық қаласы Ішкі істер басқармасы әйелдерді зорлық-зомбылықтан қорғау тобының аға инспекторы, полиция капитаны Ақмарал Абзалқызы, қалалық нәресте үйінің аға акушері Светлана Сейітқызы және т.б. өз ойларын ортаға салып, жиналған студенттерге тағылымды әңгімелерін айтты.
Дөңгелек үстелде жас ақын Батырлан Сағынтайдың жыр жолдары оқылды. Жас автордың шығармасын оқырманның назарына ұсынып отырмыз.

Қайрат ЕСМАҒАНБЕТОВ

Ағайын, ал жырымды ақтарамын,
Жөн болар сенімдерді ақтағаным.
Кешегі Ақан сері, Біржан салдар,
Айтулы тұлғаң еді көпке мәлім.

Талай қызға ғашық болған дейді ақынды,
Мұнысы жақын түгіл жатқа мәлім.
Бірақта біз білеміз сері ақынның,
Иманын нәпсісіне сатпағанын.

Ал, бүгін көріп жүрміз көп жігіттер,
Сері боп шырғалаң іс бастағанын.
Қыз деген күні ертеңгі ана емес пе,
Сондықтан сақтаған жөн аппақ арын.

Қыз арын таптағандар білер ме екен,
Аналардың арын да таптағанын.
Тағы да айтайын мен кісілік жыр,
Кетейін тыңдарманға ұсынып жыр.

Ал, енді қыздар жайын қозғар болсам,
Ұшқалақ боп кейбірі ұшынып жүр.
Кіндік ашып қылады екен кімді ғашық,
Көңілім осы жайға қысылып жүр.

Көлігі жоқ жігіттерге қарамайм деп,
Мұрнын көкке шүйіріп, ісініп жүр.
Ағайын мұндай қызға не айтамыз,
Әйтеуір ер бағасын түсіріп жүр.

Байға тию дегенді кейбір қыздар,
Тікелей мағынада түсініп жүр.
Байыпты ойларымды саралаңдар,
Бұл сөзімді жөн көрмес пе көп адамдар.

Бәрі де бір Алланың бейнесі ғой,
Әйелді кем, ерді артық санамаңдар.
Бес күндік бұл дүние өтер, кетер,
Бір-біріңді қашанда бағалаңдар.

Батырлан САҒЫНТАЙ,

АрқМПИ студенті.