Ауылшаруашылық жәрмеңке – сапалы азық-түлік өнімдерін төмен бағамен сатып алуға мүмкіндік беретін бірден-бір шара. Бағаның күн санап күрт жоғарылап бара жатқанын ескерсек, қазіргі таңда жәрмеңке өткізудің қарапайым халыққа тигізер пайдасы зор екенін байқау қиын емес.
Сапалы әрі арзан ет, сүт, ұн, көкөніс және тағы басқа күнделікті асқа пайдаланатын тауарларды көтерме бағамен сатып алу үшін бұрын-соңды арқалықтықтар сенбі сайын теміржол вокзалының маңындағы коммуналдық базарға баратын. Бұл базар бұған дейін «Арқалық азық-түлік компаниясы» ЖШС мүлігі болып саналған еді. Демек, жақында аталмыш серіктестіктің жойылуы салдарынан бұл базар аукционға қойылып, жеке тұлғаға сатылды. Өткен аптада әкімдікте болған жиналыста жәрмеңкенің болашақта қайда болатыны жайында сөз қозғалды.
Қала әкімі Амантай БАЛҒАРИН жәрмеңке жұмысын бәсеңдетпей, керісінше одан әрі жандандыру қажеттігіне тоқталды. «Жәрмеңкеге ауылдардың қатысу белсенділігі төмен. Олардың ішінде, тек қана Ашутасты ауылын ғана бөле-жара айтуға болады. Қалған ауылдарды шақыру керек. Тіпті, көршілес Жанкелдин, Амангелді аудандарының кәсіпкерлеріне ұсыныс жасап, оларды да жәрмеңкеге қатысуға тарту қажет. Жәрмеңкеге неғұрлым көп кәсіпкер келсе, бәсекелестік те соғұрлым күшейе түседі. Ал, бәсекелестік болған жерде, баға да тиімді болады», - деді қала басшысы.
А. Балғарин ең бастысы делдалсыз жұмыс жасау қажеттігін айтты. Яғни, сатушы мен сатып алушының арасында ешкім болмауы тиіс. Сонда ғана баға халыққа қолайлы деңгейде болады. Сол үшін коммуналдық базардың жаңа иегері жалға беру үшін ақы сұрайтын болса, жәрмеңкені басқа жерде өткізу керектігін жеткізді. Бұл орайда А. Балғарин Қостанай, Рудный қалаларында ауылшаруашылық жәрмеңкелер орталық алаңдарда өткізілетін тілге тиек етіп, Арқалықта да бұл тәжірибеге сүйенуге әбден болатынын айтты.
Еске сала кетсек, осыдан бірталай жыл бұрын ауылшаруашылық жәрмеңкелер «Наурыз» алаңында өткізіліп тұратын. Бірақ, неге екені белгісіз, жәрмеңке коммуналдық базарға «көшіп» кетті. Егер, қала басшысының ұсынысы жүзеге асырылса, қала жұртшылығына қолайлы болары сөзсіз. Себебі, орталық – бәріне де жақын. Әрі «Наурыз» алаңының көлемі жағынан коммуналдық базардан үлкен, яғни жәрмеңкеге қатысушы кәсіпкерлер санын ұлғайтуға мүмкіндік мол. Арқалық қаласы әкімдігі ауылшаруашылық бөлімінің басшысы Ғалымбек НҰРЛЫБЕКОВТЫҢ айтуы бойынша, егер жәрмеңке «Наурыз» алаңында өтетін болса, онда арнайы сауда орындарын, яғни палаткалар орнату керек болады. Жеңіл-желпі сауда орындарын жасау үшін әрқайсысына 100 мың теңгедей қаражат қажет екен.
Не болса да, жәрмеңкенің біріншіден сапасы, одан кейін жиілігі артатын болса, үшіншіден өтетін орны орталыққа ойысса, жергілікті тұрғындар үшін өте қолайлы болатыны сөзсіз.
Қайрат ЕСМАҒАНБЕТОВ
