Қаламыздың мерейтойына орай кәсіпкерлер қауымдастығы тарту жасады. Биыл ғана күрделі жөндеуден өтіп, ауласы қоршалып, абаттандырылып жатқан №4 орта мектептің ауласына 60-там астам сүмбіл терек, шаған, қайың отырғызылды. Игі бастаманы іске асырып, ұйымдастырған – Арқалық қаласы әкімдігінің кәсіпкерлік бөлімі, «Даму» кәсіпкерлікті қолдау қорының қалалық өкілдігі және Қостанай облысы кәсіпкерлер палатасының қалалық филиалы.

Қаланың көркін ашып, ажарландыру – қаламыздың әр тұрғынына тиесілі міндет екені даусыз. Кәсіпкерлер өздерінің азаматтық парызын орындап, ортақ іске үлес қосу мақсатында қала орталығында орналасқан мектептің ауласын көгалдандыруға бел буған екен. Күн санап ауласы абаттандырылып келе жатқан білім ордасын одан әрі көріктендіру бір жағынан қаланың мерейтойына өзіндік тарту болса, екіншіден жас жеткіншектерге, жалпы қаланың белсенді азаматтарына үлгі болар деген үмітте іс-шара ұйымдастырушылары мен кәсіпкерлер қауымы.

Аялы ағаш – саялы демекші, кәсіпкерлер жапырағы жайқала өсетін ағаш түрлерін отырғызуды ұйғарыпты. Үлгі тұтар іске белсенді қатысқандар қатарында мемлекеттік көмек арқылы өз шаруасын дөңгелетіп отырған кәсіпкерлер, яғни «Бек+ТВ» ЖШС, «RG Газсервис» ЖШС, «Нұр - Ислам» АӨК ӨК, «Сейдаханова», «Соколова», «Құдайбергенова», «Арбабаева», «Алтынбаев», «Цвентух А.», «Қасымбаева», «Нұрғали Е.Ә», «Кабдугалиева», «Ильяшов», «Ергалиева», «Юпов», «Азмаганбетов», «Сапабекова» жеке кәсіпкерлері.

Қала әкімдігі кәсіперлік бөлімінің басшысы Дархан Хамзин кәсіпкерлерге отырғызылған ағаштары жапырағын кең жайып, қалаға сән беруін тіледі. Жас ағаштарды отырғызған кәсіпкерлер өз кезегінде уақытында күтім жасауға уәделерін берді.

Қайрат ЕСМАҒАНБЕТОВ