Қазақтың біртуар азаматы, көрнекті композитор Әбілахат Еспаев – қазақтың саз өнеріне өзіндік қолтаңбасын қалдырған қайраткер. Оның «Маржан қыз», «Ұстазым менің, ұстазым», «Әлі әсімде» атты туындылары халықтың сүйікті әндеріне айналған. Атақты сазгердің өмірі мен шығармашылығына шолу жасамақ ниетпен облыстық Дала өлкесі тарихы мұражайы «Ән әлемінің Әбілахаты» атты ән кешін ұйымдастырды.

Мұражай директоры Гүлбану Төкенқызының айтуынша, ән кешіне музыка саласында еңбек етіп жүрген мамандар, белгілі әншілер, ұстаздар және музыка мамандығында оқып жүрген колледж бен институт студенттері арнайы шақырылды. Әбілахат Еспаевтың ғибратты ғұмыры мен шығармашылығын сөз етіп, оның әсем әндерін орындау, әсіресе, жастар үшін пайдалы. Себебі, көрнекті композитордың әндері – тәрбиелік мәні зор, адамгершілікке, адалдыққа, пәк сезім мен махаббатқа толы асыл мұра.

Ән кешінде халықаралық байқаулардың лауреаты «Інжу маржан» тобы, қалалық «Қазына» ардагерлер ансамблі және тағы басқа орындаушылар композитор өлеңдерін нақышына келтіріп орындады. Сондай-ақ, оның өмір деректері, шығармашылық жолы туралы мағлұмат берілді.

«АХ»