Қаламыздың «Студенттер көктемі» дәстүрлі байқауы биыл өз жалғасын тауып, шығармашылыққа, өнерге қабілеті бар жастардың талабын айқындауға жол ашты. Бұл байқаудың әр оқу орны үшін маңызы бөлекше. Себебі, студенттер сахна төрінде өз білім ордасының намысын қорғап, өнерін көпшілік қауымға паш ете алады.

«Студенттер көктемі – 2013» байқауына биыл жергілікті 5 колледждің өрендері өзара бәсекеге түсті. Вокалдық ансамбль, соло, дуэт, трио, квартет, аспаптық ансамбль, ұлттық би, хип-хоп, модерн жанрындағы хореографиялық қойылымдар, терме, жыр, халық әндері сияқты өнер түрлерінен түрлі қойылымдар қойылды. Сондай-ақ, былтырғы жылдан бастау алған, белгілі сатирик, этнограф Сейіт Кенжеахметов әзілдері айдарымен қаламгердің сатиралық туындылары оқылды, сахналанды. Сонымен қатар, қолөнерге, бейнелеу өнеріне икемі бар студенттердің көрмесі қойылды.

Жастардың дайындап әкелген сан түрлі қойылымдарына баға беру қазылар алқасының мүшелері – ҚР мәдениет қайраткері Бораш Әбеновке, қалалық мәдениет және тілдерді дамыту бөлімінің басшысы Сандуғаш Алматоваға, Мәдениет сарайының көркемдік жетекшісі Зәмзәгүл Мергеноваға, Жастардың бастамалар орталығының төрағасы Дархан Кикимовке, «Ақбота» халықтық би ансамблінің хореографы Әйгерім Балғынбаеваға жүктелді.

Әр оқу орнына сахнада өнер көрсетуге жарты сағат көлемінде уақыт бөлінді. Ән мен би, әзіл мен өнер әлеміне серуендеткен жас өркендердің қойылымдарына жиналған халайық риза болып, қошеметін аямады. Байқау қорытындысында қазылар алқасының шешімі бойынша әр оқу орнына арнайы номинациялар берілді. Номинациялардың атауына қарағанда, әр оқу орны өзіндік бір қырынан ерекше көзге түскен сияқты.

Сонымен, Н. Құлжанова атындағы Торғай гуманитарлық колледжі – «Дәстүрлі өнер өрендері», Арқалық медицина колледжі – «Сахна еркелері», Арқалық политехникалық колледжі - «Жалынды жастар», Торғай аграрлық техникалық колледжі – «Ұлы елдің ұландары», Арқалық көпсалалы колледжі – «Ғасыр пернесі» номинацияларына иеленді.

Байқау соңында қазылар алқасы мен байқаудың ұйымдастырушы – Мәдениет сарайының өкілдері байқауға ынта-жігермен, белсенділікпен қатысқан студенттерге, өнерпаз жастардың талабын ұштап, лайықты деңгейде дайындалуға атсалысқан оқу орындарының басшыларына жылы лебіздерін білдірді.

Қайрат ЕСМАҒАНБЕТОВ