Қаламыздың қадірменді қариясы, соғыс ардагері Мұратқали Қамалұлы – қазақтың алғаш журналист қызы Нәзипа Құлжанованың есімін дәріптеп, ұрпақ санасына жеткізуде көп еңбек сіңірген. Жасы тоқсанда болса да, бүгіндері де талай табалдырықты тоздырып, есімі еленбей, мерейтойы аталмай жүрген Торғай қызына лайықты құрмет көрсетуге үндеп жүр.

Ұлы Жеңіс күніне орай Мұратқали Қамалұлы Құлжановтар туралы жазған естеліктерін топтастырып, кітап қылып шығарды. Естеліктер жинағының тұсаукесеріне ҚР Парламентінің мәжіліс депутаты Р. Сарпеков, қала әкімі Қ. Ғабдулин, қалалық мәслихат хатшысы Н. Шалдыбаев және т.б. меймандар қатынасты.

Кітаптың бірінші бөлімінде Нұрғали мен Нәзипаның халқына көрсеткен қалтқысыз қызметі туралы мол деректер топтастырылған. Екінші жартысында ардагердің өзінің өмір жолы, майданда бастан кешкендері, бейбіт өмірдегі еңбек жолдары сипатталады.

Жаңа кітаптың тұсауын кесу рәсімі республикалық «Абай» қорының президенті Балтабек Ерсәлімов пен ҚР құрметті журналисі, кітапты құрастырушы Майра Шөкенге берілді. Керме қиылып, шашу шашылды. Н. Құлжанова атындағы Торғай гуманитарлық колледжінің өнерлі шәкірттері ән - күймен әрледі.

Қарт қаламгердің Семейге барған сапарынан әзірленген жарты сағаттық деректі фильм көрсетілді. Қалалық мешіттің бас имамы Бектұрсын қажы Уәлиев аруақтарға арнап Құран бағыштады.