Облыстық Дала өлкесі тарихы мұражайының ұжымы қаламыздың абыройын асырып, еліне елеулі еңбек етіп жүрген жандардың өмірі мен шығармашылығын насихаттау мақсатында портреттік кеш атты кездесулер өткізуді дәстүрге айналдырған. Бұл жолы кеш кейіпкері – танымал журналист, диктор, тележүргізуші, ұстаз – «Арқа дидары» ЖШС директоры Айткүл БЕКЕНТАЙ болды.

Еңбек жолында ұстаздық пен журналистика мамандығын ұштастыра білген Айткүл Ескендірқызы – қаламызға танымал тұлға. Ондаған жылдар бойы қала өмірінің шарайнасы, жаңалықтарының жаршысы жергілікті теледидар ұжымын басқарып келеді. Көп жылдар бойы мектепте сабақ беріп, жас жеткіншектерді ғылымға баулыған. Кеш қонағына оның балалық балғын шағы, қиындығы да, қызығы да қатар жүретін журналистика мамандығына келу жолы, педагогика саласына сіңірген еңбегі мен бүгінгі қызметі турасында сауалдар қойылып, ғибратты кеш өткізілді. Кездесуге әріптес, қызметтес, сыйлас жандар мен жергілікті оқу орындарының студенттері қатысты.

Журналистика – кез-келген салада біліктілікті қажет ететін күрделі мамандық. Теледидар қызметі, есесіне, қосымша жауапкершілік жүктейді. Халық алдына шығып, жаңалықтарды жеткізу оңай емес. Мінсіз дикция мен сыртқы келбеттің лайықты болуы бір бөлек, шектеулі уақыт аралығында көптеген мәліметтерді талдап-тарқата білу міндет. Осындай жоғарғы талапқа сай болып қана қоймай, көптеген жылдар ішінде бірнеше теледидар тілшілерін тәрбие мектебінен өткізген Айткүл Ескендірқызының еңбегі ересен.

Кеш соңында келген қонақтар жылы лебіздерін білдіріп, портреттік кеш кейіпкерінің құшағын гүлге толтырды.