Текті Торғай елінің атақ-даңқын жыр шумақтарымен асқақтатып жүрген ақындардың бірі – Молдатай Жапаров ағамыздың жуырда «Торғайым – алтын бесік» атты кітабы жарыққа шықты. Оған автордың әр жылдарда жазған туындылары енген.

Молдатай Жапаров – ерекше ақын. Қай өлеңін алып қарасаң да, терең ой мен көркемдік үндесіп жатады. Сөз саптауынан, өлең өрнегінен мін табу қиын. Бәрі де үйлесімді, жарасымды әрі оқуға жеңіл. Бұл – ақынның шығармашылық жолындағы ірі табыстардың бірі десек қате болмас. Себебі бұл жеңілдік пен жарасымдылық – еңбектену мен ізденудің жемісі.

М. Жапаров өлеңдерінің басым көпшілігі Торғай елін өзек еткен. Бұл автордың – туған жерге сүйіспеншілігін білдірсе керек. Шығармалары республикалық, облыстық деңгейде жариялануға тұрарлық дүниелер болса да, М. Жапаров ең әуелі жергілікті қос газет арқылы жырларын туған еліне жеткізуге асық. Мұны да автордың азаматтығы деп білгеніміз жөн сияқты.

«Торғайым – алтын бесік» кітабында Торғай елінің танымал тұлғалары, ақынның өз замандастарына арнаған өлеңдері де топтастырылған. Композитор Қалибек Деріпсалдин,  айтыскер ақын Айбек Қалиев, би өнерінің майталманы Ерсін Жүсіпов, қаламгер Әубәкір Қылышбайұлы және т.б. танымал тұлғаларға жүрек түкпірінен шыққан лебізін жыр жолдарымен жеткізген екен.

Ақын ағамызды алғашқы кітабымен құттықтай отырып, шығармашылық табыс, шалқар шабыт тілейміз.

Қайрат ЕСМАҒАНБЕТОВ