Айтыс өнерінің дүлдүлі, халық ақыны Әсия Беркенованың шығармашылық кеші болып өтті. Оған Арқалық қаласының өнерсүйер қауымы мен жастары қатысты.

Республика жұртшылығына танымал болған айтыскерлердің бірі Әсия Беркенова Қостанай облысы, Әулиекөл ауданында дүниеге келген. Талай аламан айтыстың бас жүлделерін қанжығасына байлаған азулы айтыскер.

Шығармашылық кештің тізгінін айтыскер ақын Айбек Қалиев ұстап, алдыңғы толқын ақындар шоғырының жарық жұлдызы Әсия Беркенованың өмірі мен шығармашылығы жайында сыр шертті. Жиналған жұрт көкейіндегі сауалдарын қойып, оған толымды жауап алды. Кездесу барысында ақын әр жылдары жазған жырларын да оқып отырды.

Қала әкімі Ғазиз Бекмұхамедов, қаламыздың аға буын өкілдері Кәки Ақан, Орекен Алматов сияқты ақсақалдар Әсия Беркеноваға жылы лебіздерін білдіріп, мерейтойымен құттықтады.