Халықаралық әйелдер мерекесіне орай дәстүрлі келіндер сыны - “Ең әдемі келіншек” байқауы облыстық Қазақ жасөспірімдер театрында болып өтті.

Байқаудың ұйымдастырушысы - қалалық мәдениет сарайы. Барлығы 8 келін сайысқа түсіп, бақ сынасты.

Келіншектердің өнері мен ажарына төреші болған – қалалық мәдениет сарайының әдіскері Зәмзәгүл Тапалова, облыстық ғылыми-әмбебап кітапханасының директоры Алма Нұрманова, облыстық Дала өлкесі тарих мұражайының директоры Гүлбану Елтебаева және т.б. болды.

Сайыс дәстүрлі таныстыру, отбасымен өнер көрсету, сұрақ-жауап, тағам дайындау, тосын жағдай, кешкі киім үлгісі сияқты кезеңдерден тұрды. Барлық кезеңдерде жоғарғы ұпай жинап, жеңіске жеткен қатысушы Арайлым БАБАСОВА “Ең әдемі келіншек” атағына ие болып, ұйымдастырушылардың арнайы сыйлығына иеленді.

Ұйымдастырушылардың айтуынша, жылда дәстүрге айналған бұл байқау отбасылық құндылықтарды дәріптеп, қазақи келіннің келбетін насихаттауға, салт-дәстүрлерімізді жаңғыртып, ұлттық құндылықтарымызды кейіпгі ұрпаққа дәріптеуді мақсат етеді.